Hjarta Voltaires

Mál og menning hefur gefið út bókina Hjarta Voltaires eftir Luis López Nieves í íslenskri þýðingu Kristínar Guðrúnar Jónsdóttur. Um er að ræða viðburðaríka spennusögu þar sem skyggnst er inn í hugarheim lærðra manna á 18. öld. Getum við sett okkur í spor Voltaires? Vísindamaðurinn Roland de Luziers fær það ögrandi verkefni að komast til botns í margslunginni ráðgátunni sem ef til vill væri betur komin óleyst.

FRAM AF

Út er komin geislaplatan FRAM AF með gítarleikaranum Ómari Guðjónssyni og í tilefni af því verða haldnir útgáfutónleikar annað kvöld, miðvikudagskvöldið 13. ágúst, klukkan 21.00 í Iðnó. Með Ómari spila þeir Matthías MD Hemstock á trommur og Þorgrímur Jónsson á kontrabassa.

Á plötunni eru níu lög eftir Ómar og er þeim lýst sem einhvers konar blöndu af rokki, poppi og djasstónlist.

Sýningarlok á morgun

Senn líður að lokum málverkasýningar myndlistarmannsins Árna Björns í Eden í Hveragerði, en hún var opnuð þann 31. september og stendur til 13. ágúst. Árni sýnir meðal annars portrettmyndir af Davíð Oddssyni og landslagsmyndir í olíu. Árni hefur haldið einkasýningar víða hér á landi og einnig í bænum Yecla á Spáni. Hann er húsgagnasmiður og rak innréttingarverkstæði og húsgagnaverslun um árabil.